ဘားအံ၌ (၃၇)နှစ်မြောက် ကလေးသူငယ်အခွင့်အရေးများဆိုင်ရာ ကုလသမဂ္ဂကွန်ဗင်းရှင်းနှစ်ပတ်လည်နေ့အထိမ်းအမှတ် (ကမ္ဘာ့ကလေးများနေ့)အခမ်းအနားကျင်းပ
ဘားအံ နိုဝင်ဘာ ၂၀
“ကလေးများအနာဂတ်လှပရေးနေ့စဉ်အခွင့်အရေးများမြှင့်တင်ပေး”ဆောင်ပုဒ်ဖြင့် (၃၇)နှစ်မြောက်ကလေးသူငယ် အခွင့်အရေးများဆိုင်ရာ ကုလသမဂ္ဂကွန်ဗင်းရှင်းနှစ်ပတ်လည်နေ့အထိမ်းအမှတ် (ကမ္ဘာ့ကလေးများနေ့) အခမ်းအနားကို နိုဝင်ဘာလ ၂၀ ရက်နေ့ နံနက်ပိုင်းက ဘားအံမြို့၊ ဇွဲကပင်ခန်းမ၌ ကျင်းပသည်။
အခမ်းအနားတွင် ပြည်နယ်ဝန်ကြီးချုပ်ဦးစောမြင့်ဦးက ကလေးသူငယ်များ၏ လုံခြုံမှုနှင့်အကောင်းဆုံးအနာဂတ် များရရှိစေရန် ဌာနဆိုင်ရာများ၊ အရပ်ဘက်အဖွဲ့အစည်းများ၊ ရပ်ရွာလူထု၊ လူမှုရေးအဖွဲ့အစည်းများနှင့်မိဘများ၊ ဆရာ၊ဆရာ မများအားလုံးတွင် တာဝန်ရှိပါကြောင်းနှင့် ကလေးတစ်ဦး၏အားနည်းချက်ကို အပြစ်တင်ခြင်းထက်နားလည်ပေးခြင်း၊ အပြစ်ပေးခြင်းထက်လမ်းညွှန်သင်ကြားပေးခြင်းနှင့် အမိန့်ပေးခြင်းထက် အားပေးနားထောင်ခြင်းတို့ကို လက်တွေ့ကျင့်သုံး ဆောင်ရွက်ပေးကြစေလိုကြောင်း တိုက်တွန်းပြောကြားသည်။
ထို့နောက် ပြည်နယ်ဝန်ကြီးချုပ်၊ ပြည်နယ်အမျိုးသမီးရေးရာအဖွဲ့နှင့်မိခင်နှင့်ကလေးစောင့်ရှောက်မှုကြီးကြပ်ရေး အဖွဲ့နာယက၊ ပြည်နယ်လွှတ်တော်ဥက္ကဋ္ဌ၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်လွှတ်တော်ဒုတိယဥက္ကဋ္ဌ၊ ပြည်နယ်လူမှုရေးဝန်ကြီးဦးစောထွန်းအောင်တို့က ဘားအံ၊ လှိုင်းဘွဲ၊ ကော့ကရိတ်၊ မြဝတီ၊ သံတောင်ကြီး၊ ကမမောင်းမြို့ များရှိ ကိုယ့်အားကိုယ်ကိုးမူလတန်းကြိုကျောင်း(၁၃၆)ကျောင်းအတွက် တာဝန်ခံဆရာမတစ်ဦးလျှင် ၆ သိန်းနှုန်း၊ စာသင် ဆရာမတစ်ဦးလျှင် ၃သိန်း၆သောင်းနှုန်း၊ သင်ထောက်ကူပစ္စည်းဖိုး တစ်သိန်းနှုန်း၊ တစ်ကျောင်းလျှင် ငွေကျပ် ၁၀ သိန်း ၆ သောင်းနှုန်းဖြင့် စုစုပေါင်းငွေကျပ် ၁၄၄၁ သိန်း ၆ သောင်းကို ချီးမြှင့်ပေးအပ်ခဲ့ကြသည်။
ယင်းနောက် ပြည်နယ်ဝန်ကြီးချုပ်နှင့်အခမ်းအနားသို့တက်ရောက်လာသူများ၊ မူလတန်းကြိုကျောင်းများမှ ရင်သွေး ငယ်များ၊ ၎င်းတို့၏မိဘများ၊ ဆရာ၊ဆရာမများ၊ လူမှုရေးအသင်းအဖွဲ့များက ကမ္ဘာ့ကလေးများနေ့အထိမ်းအမှတ် Video Clip ကို အတူတကွကြည့်ရှုခဲ့ကြပြီး ဘားအံမြို့၊ အမှတ်(၂)မူလတန်းကြိုကျောင်းနှင့် အမှတ်(၁)မူလတန်းကြိုကျောင်း၊ ပုဂ္ဂလိက မူလတန်းကြိုကျောင်းများနှင့် ကိုယ့်အားကိုယ်ကိုးမူလတန်းကြိုကျောင်းများမှ ရင်သွေးငယ်များက တေးသီချင်းများဖြင့် သီဆိုကပြဖျော်ဖြေကြရာ ပြည်နယ်ဝန်ကြီးချုပ်၊ ပြည်နယ်အမျိုးသမီးရေးရာအဖွဲ့နှင့်မိခင်နှင့်ကလေးစောင့်ရှောက်မှုကြီး ကြပ်ရေးအဖွဲ့နာယကနှင့်တာဝန်ရှိသူများက အာဟာရဖြည့်စွက်အစားအစာများ ဝေငှပေး၍ တာဝန်ခံကျောင်းအုပ်များထံ ဂုဏ်ပြုဆုများအသီးသီးပေးအပ်ချီးမြှင့်ကြသည်။
ထို့နောက် ပြည်နယ်ဝန်ကြီးချုပ်၊ ပြည်နယ်အမျိုးသမီးရေးရာအဖွဲ့နှင့်မိခင်နှင့်ကလေးစောင့်ရှောက်မှုကြီးကြပ်ရေး အဖွဲ့နာယကနှင့် တာဝန်ရှိသူများက ကမ္ဘာ့ကလေးများနေ့အခမ်းအနားသို့တက်ရောက်လာသော လူမှုရေးအသင်းအဖွဲ့များ၊ ရင်သွေးငယ်များ၊ ၎င်းတို့၏မိဘများနှင့်ဆရာ၊ဆရာမများအား ရင်းရင်းနှီးနှီးတွေ့ဆုံနှုတ်ဆက်၍ အားပေးစကားများ ပြောကြားခဲ့ပါသည်။















